ប្រាសាទក្រវ៉ាន់ជាប្រាសាទចំណាស់មួយដែលទាក់ទាញអារម្មណ៍ពីភ្ញៀវជាតិ និងអន្តរជាតិ
ប្រាសាទក្រវ៉ាន់ជាប្រាសាទចំណាស់មួយដែលទាក់ទាញអារម្មណ៍ពីភ្ញៀវជាតិ និងអន្តរជាតិ
បើយើងធ្វើដំណើរ ចេញពីទីប្រជុំជន ទេសចរណ៍ក្រុងសៀមរាប រួចបន្តដំណើរមក ប្រាសាទអង្គរតូច ហើយបត់ស្ដាំដៃ ក្នុងចំងាយជិត ៣ គីឡូម៉ែត្រ ឆ្ពោះទៅកាន់ស្រះស្រង់នោះ គេនឹងប្រទះឃើញ សម្រស់ដ៏ស្រស់ ត្រកាល រកអ្វីប្រៀបផ្ទឹមគ្មាន របស់ប្រាសាទក្រវ៉ាន់ កំពុងឈរបង្អួតរាង ដែលមានវ័យចំណាស់ជាងគេ ក្នុងចំណោមប្រាង្គប្រាសាទ ដែលកសាងអំពីឥដ្ឋ និងកំបោរបាយអរ។
ទីតាំងប្រាសាទក្រវ៉ាន់ ស្ថិតនៅក្នុងភូមិក្រវ៉ាន់ សង្កាត់នគរធំ ក្រុងសៀមរាប។ ប្រាសាទក្រវ៉ាន់ កសាងនៅសតវត្សរ៍ទី១០ ដែលស្ថាបនាឡើងដោយ ព្រះមហាក្សត្រ ហារីសវរ្ម័នទី១ ដោយកសាងទៅតាមរចនាបថ ប្រា សាទកោះកេរ្ដិ៍ ប្រាសាទសម្បូរព្រៃគុក ប្រាសាទនាងខ្មៅ សរុប ១៥ រចនាបថ ដើម្បីឧទ្ទិសដល់ព្រះវិស្ណុរ។
បើតាមការឱ្យដឹងពី លោកពេជ្រ មុន្នី ជាមគ្គុទ្ទេសក៍ទេសចរ ផ្នែកភាសាអង់គ្លេស បានប្រាប់ថា ជាទូទៅ ភ្ញៀវទេសចរ តែងតែមានការកោតសរសើរដល់ស្នាដៃបុព្វបុរសខ្មែរ កាលពីជំនាន់ដើម ដែលមានតម្រិះវិជ្ជា និងបារមីខ្លាំងពូកែ អាចកសាងប្រាសាទនីមួយៗ រាប់រយឆ្នាំហើយ នៅតែមានសម្រស់ត្រកាលរឹងមាំ។
លោក ពេជ្រ មុន្នី បានបន្ដថា ប្រាសាទក្រវ៉ាន់នេះ គឺនៅចន្លោះប្រាសាទបន្ទាយក្ដី និងស្រះស្រង់ ហើយជាប្រាសាទមួយ ដែលមានវ័យចំណាស់ជាងគេ ក្នុងចំណោមប្រាង្គប្រាសាទ ដែលកសាងពីដីឥដ្ឋ លាយជាមួយកំបោរបាយអរ ត្រូវភ្ញៀវទេសចរ ចាប់អារម្មណ៍យ៉ាងខ្លាំង ព្រមទាំងផ្ដិតយករូបភាព ដ៏ស្រស់នោះផងដែរ។
លោកបានបន្ដថា នៅក្នុងប្រាសាទក្រវ៉ាន់នេះ មានរូបចំលាក់មួយចំនួន ដែលបង្ហាញពីនារីខ្មែរ កាលពីសម័យនោះ ហើយប្រាសាទនោះ ត្រូវបានគេកសាងឡើង ដើម្បីព្រះមហាឥស្សី នៃព្រះវិស្ណុរ។ លោកបានបន្ថែមទៀតថា ប្រាសាទនេះ រងការខូចខាតខ្លះដែរ កាលពីជំនាន់បារាំងកាន់កាប់ ហើយបារាំង បានចាប់ផ្ដើមជួសជុលបន្ថែម នៅឆ្នាំ១៩៦០។
ក្រុមឆ្មាំប្រាសាទ បានប្រាប់ថា ជារៀងរាល់ថ្ងៃ ភ្ញៀវទេសចរជាតិ និងអន្ដរជាតិ តែងឈៀងចូលទស្សនា ប្រាសាទវ័យចំណាស់មួយនេះ ជាហូរហែ ព្រោះនៅតាមដងផ្លូវនេះ គេធ្វើដំណើរទៅកំសាន្ដ នៅប្រាសាទបន្ទាយស្រី ក្បាលស្ពាន ភ្នំគូលែនជាដើម ដែលក្នុង១ថ្ងៃៗ អាចមានភ្ញៀវទេសចរ ចូលទស្សនា ប្រាង្គប្រាសាទនេះ មិនតិចជាងមួយពាន់នោះទេ៕
ប្រភព៖everyday.com.kh
