រមណីយដ្ឋានសង់ពីដើមឬស្សីលើភ្នំហាន់ជ័យ ទឹកដីខេត្តកំពង់ចាម

ដោយ៖ ទី សារឿន​​ | ថ្ងៃពុធ ទី១៧ ខែតុលា ឆ្នាំ២០១៨​ | ទេសចរណ៍ | 0 |
រមណីយដ្ឋានសង់ពីដើមឬស្សីលើភ្នំហាន់ជ័យ ទឹកដីខេត្តកំពង់ចាម រមណីយដ្ឋានសង់ពីដើមឬស្សីលើភ្នំហាន់ជ័យ ទឹកដីខេត្តកំពង់ចាម

រមណីយដ្ឋាននៅលើភ្នំហាន់ជ័យ ដែល​មាន​ឈ្មោះជាភាសាអង់គ្លេសថា HANCHEY BAMBOO-RESORT បានបើកសម្ពោធជា​ផ្លូវការនៅថ្ងៃទី១៣ ខែតុលា ឆ្នាំ២០១៨ ថ្មីៗនេះ ហើយបានបើកឲ្យភ្ញៀវចូលទស្សនា​និង​ស្នាក់នៅចាប់ពីថ្ងៃទី១៥ ខែតុលាតទៅ។

រមណីយដ្ឋានឬស្សី ​ HANCHEY BAMBOO-RESORT ត្រូវបានសាងសង់លើដីទំហំ៥ហិកតា ស្ថិតនៅជាប់រមណីយដ្ឋាន​ប្រវត្តិសាស្រ្ត ភ្នំហាន់ជ័យ ក្នុងទឹកដីភូមិព្រែកព្រះអង្គ ឃុំព្រែកបាក់ ស្រុកស្ទឹងត្រង់ និងមានចម្ងាយ២៤គីឡូម៉ែត្រពីក្រុងកំពង់ចាម។

រមណីយដ្ឋានកែច្នៃពីដើមឬស្សីស្ទើរទាំងស្រុងនៅលើភ្នំហាន់ជ័យ​ខេត្តកំពង់ចាមនេះ គឺមានការច្នៃប្រឌិតប្រកបដោយភាពស្រមើស្រម៉ៃមួយ ដែលបានចំណាយទុនវិនិយោគទឹកប្រាក់ជាង៥០ម៉ឺនដុល្លារអាមេរិក ដោយក្នុងនោះមានអាគារសរុបចំនួន១៥ គឺសង់ពីដើម​ឬស្សីស្រុក ឬស្សីស្រុកចិន និងឬស្សីពីងពង់ ក្នុងនោះមានជាអគារបឹងគីឡូ អគារ​ទទួលភ្ញៀវ ភោជនីយដ្ឋាន អគារសមាធិ អគារអន្តេវាសិក អគារបុគ្គលិក អគារធ្វើ​សរសៃ និងអាងហែលទឹកជាដើម។


បើតាមការឲ្យដឹងពីអ្នកគ្រប់គ្រងទូទៅនៅរមណីយដ្ឋានមួយនេះ​បានឲ្យដឹងថា រមណីយដ្ឋាននេះមានផ្តល់សេវាកម្មទេសចរណ៍ បដិសណ្ឋារកិច្ច ភោជនីយដ្ឋាន សណ្ឋាគារ ជូនភ្ញៀវដែលមកកម្សាន្ត លំហែកាយ វិបស្សនា សមាធិ ដើម្បីព្យាបាលផ្លូវចិត្ត ដែលមានគ្រូពេទ្យផ្នែកជំនាញខាងចិត្តសាស្រ្តមកព្យាបាលផងដែរ។ លោកបានបន្តថា រមណីដ្ឋាននេះបានបង្រៀនប្រជាពលរដ្ឋ ក្នុងសហគមន៍ជុំវិញ​តំបន់​ភ្នំហាន់ជ័យ ឲ្យក្លាយជាបុគ្គលិកបម្រើការ ក្នុងរមណីយដ្ឋាននេះតែម្តង ដើម្បីកាត់​បន្ថយភាពគ្មានការងារធ្វើ និងជួយបង្កើនប្រាប់ចំណូល ដល់ប្រជាពលរដ្ឋដែល​រស់​នៅ​ជុំវិញតំបន់នេះ។


​រមណីយដ្ឋាន HANCHEY BAMBOO-RESORT ដែលបានប្រើប្រាស់ឫស្សីជាង៩០%នេះ បានទទួលការទាក់ទាញ់ខ្លាំងពីភ្ញៀវទេសចរជាតិ និងអន្តរជាតិ ដោយរមណីយដ្ឋាននេះពិតជាមានលក្ខណៈស្រស់ស្អាត មានខ្យល់ឱកាសល្អបរិសុទ្ធ ហើយធ្វើឲ្យមានអារម្មណ៍សប្បាយរីករាយ ភ្លេចអស់នូវទុក្ខកង្វល់ ពេលដែលបាន​ទៅដល់តំបន់នេះ ដោយភ្ញៀវទេសចរអាចគយគន់ទេសភាព របស់ដងទន្លេមេគង្គ ពិសេសមានការ​សាងសង់​អគារ​ពីដើមឬស្សី ប្រកបដោយការច្នៃប្រឌិតខ្ពស់ ដែលបានរចនាចេញពីផ្កាឈូកនេះតែម្ដង។

សូមបញ្ជាក់ផងដែរថា រមណីយដ្ឋាន HANCHEY BAMBOO-RESORT បានបើកឲ្យដំណើរការសាកល្បង​រយ:ពេលជិតមួយខែហើយ ដោយមានភ្ញៀវមកចូលទស្សនា នៅតំបន់រមណីយដ្ឋាន​នេះជាហូហែរ ដែលក្នុងមួយថ្ងៃៗមានភ្ញៀវមកលេងកម្សាន្តចាប់ពី១០០នាក់ ទៅ៣០០នាក់ឯណោះ៕

អត្ថបទដោយ៖ ទី សារឿន

បញ្ចេញមតិ
អត្ថបទទាក់ទង