សួនកម្សាន្ត Fantawild Asian Legend នៅប្រទេសចិន ជាសួនកម្សាន្តដ៏ធំមួយដែលយកគម្រូតាមប្រាសាទបុរាណខ្មែរ
នៅថ្ងៃទី១១ ខែកញ្ញា ឆ្នាំ២០១៨ សួនកម្សាន្តដ៏ធំមួយរបស់ចិន ដែលបង្ហាញនូវរូបរាងសំណង់មហាប្រាសាទរបស់ខ្មែរ គឺប្រាសាទអង្គរវត្ត បានបើកសម្ពោធជាផ្លូវការ។ សួនដែលទើបនឹងកសាងថ្មីនេះមានឈ្មោះថា Fantawild Asian Legend ដែលមានទីតាំងស្ថិតនៅទីក្រុង ណាននីង នៃតំបន់ស្វយ័តជនជាតិជ័ងក្វាងស៊ី។
ដោយមានការរៀបចំតុបតែងនូវ ក្បូរក្បាច់រចនានូវមហាប្រាសាទអង្គររបស់កម្ពុជា សួនកម្សាន្តនេះបានធ្វើឲ្យភ្ញៀវទេសចរជាតិ និងអន្តរជាតិមានការចាប់អារម្មណ៍ជាខ្លាំង។
ចំពោះគោលបំណងនៃការការបង្កើតសួនកម្សាន្តនេះឡើង ត្រូវបានគេឲ្យដឹងថា គឺដើម្បីបង្ហាញពីអរិយធម៌ និងទំនៀមទំលាប់ប្រពៃណីសាសនា របស់បណ្តាប្រទេសក្នុងតំបន់អាស៊ាន និងប្រទេសចិន។
សួនកម្សាន្តដែលមានរូបរាងដូចប្រាសាទបុរាណរបស់ខ្មែរដ៏ធំស្កឹមស្កៃមួយនេះ ក៏មានការផ្ដល់ជូននូវការទស្សនាផ្ទាំងឯកសារគំនូចីវចល 3D មានរយះពេល១៣នាទី ស្តីពី សកម្មភាពនៃការកសាងអាណាចក្រអង្គរ របស់ព្រះរាជាណាចក្រកម្ពុជា ដែលបានរៀបចំសំរិទ្ធសំរាំង យ៉ាងល្អឥតខ្ចោះពីអ្នកដឹកនាំរឿង របស់ប្រទេសចិន។
កាលពីថ្ងៃទី១១ ខែកញ្ញា ឆ្នាំ២០១៨ បន្ទាប់ពីបញ្ចប់ពិធីសម្ពោធពិព័រណ៌ចិន-អាស៊ាន នៅក្រុងណាននីងរួមមក ប្រមុខរាជរដ្ឋាភិបាលកម្ពុជា សម្តេច ហ៊ុន សែន ក៏ដូចជាភ្ញៀវទេសចរចិន និងអន្តរជាតិ បានចូលទស្សនាសួនកម្សាន្ត Fantawild Asian Legend នេះផងដែរ។
សម្តេច ហ៊ុន សែន បានចាត់ទុកសំណង់សួនកម្សាន្តដ៏ធំមួយនេះគឺជាស្នាដៃសិល្បៈថ្មីមួយទៀត ដែលបង្ហាញឲ្យឃើញពីការចាប់អារម្មណ៍ពីសំណាក់មនុស្ស ជំនាន់ក្រោយ ពិសេសការសិក្សាស្រាវជ្រាវទៅនឹងប្រវត្តិនៃការកសាងអាណាចក្រអង្គរដ៏ល្បីល្បាញ របស់ព្រះរាជាណាចក្រកម្ពុជា។
សូមបញ្ជាក់ផងដែរថា សំណង់សួនកម្សាន្តដែលយកលំនាំតាមប្រាង្គប្រាសាទបុរាណខ្មែរនេះ គឺមានជាច្រើនរួចមកហើយ ដែលក្នុងនោះមានដូចជា សួនសត្វ Pairi Daiza នៅប្រទេសប៊ែលហ្ស៊ិក និងមជ្ឈមណ្ឌលកម្សាន្ត ដ៏ធំមួយនៅទ្វីបអឺរ៉ុបឈ្មោះ PortAventura នៅប្រទេសអេស្ប៉ាញជាដើម។
អត្ថបទដោយ៖ ទី សារឿន
សួនសត្វ Pairi Daiza នៅប្រទេសប៊ែលហ្ស៊ិក
មជ្ឈមណ្ឌលកម្សាន្ត PortAventura នៅប្រទេសអេស្ប៉ាញ