ស្វែងយល់ពី ឥស្សរិយាភរណ៍ឬមេដាយព្រះករុណាព្រះបាទ នរោត្ដម សុរាម្រឹត
ស្វែងយល់ពី ឥស្សរិយាភរណ៍ឬមេដាយព្រះករុណាព្រះបាទ នរោត្ដម សុរាម្រឹត
ឥស្សរិយាភរណ៍ ឬមេដាយ ព្រះករុណាព្រះបាទសម្ដេចព្រះ នរោត្ដម សុរាម្រឹត ព្រះមហាក្សត្រិយ៍នៃព្រះរាជអាណាចក្រកម្ពុជា (Médaille de Norodom Suramarit) ត្រូវបានបង្កើតឡើងកាលពីថ្ងៃទី១២ ខែមេសា ឆ្នាំ១៩៥៥ ដើម្បីផ្ដល់ដល់អ្នកទាំងឡាយណាដែលស្មោះត្រង់បម្រើប្រទេសជាតិ និងព្រះរាជបល្ល័ង្ក។ ឥស្សរិយាភរណ៍នេះមាន៣ប្រភេទ គឺ៖ មាស ប្រាក់ និងសំរឹទ្ធ។
ការរចនា៖ ប្រភេទរៀងមូល អង្កត់ផ្ចឹត៣៤ម.ម. ដោយមានបូភ្ជាប់ពីលើ
ផ្នែកខាងមុខ នៅចំកណ្ដាល មានឆ្លាក់រូបព្រះរាជសង្ហារ និងនៅជុំវិញមានដាក់អក្សរជាខេមរភាសាថា «ព្រះបាទសម្ដេចព្រះនរោត្ដម សុរាម្រឹត ព្រះចៅព្រះរាជអាណាចក្រកម្ពុជា»។
ផ្នែកខាងក្រោយ មានដាក់អក្សរជាបារាំងភាសាថា «NORODOM SURAMARIT ROI DU CAMBODGE» នៅក្នុងរង្វង់ ជាមួយនឹងព្រះអាទិត្យសណ្ឋានពាក់កណ្ដាលកំពុងបញ្ចេញកម្មរស្មី ទាំងផ្នែកខាងលើ និងខាងក្រោម។ នៅជុំវិញរង្វង់មានរចនាស្លឹកឈើអមផ្ទៃទាំងមូល។
ភ្ជាប់ទៅនឹងបូខាងលើរបស់មេដាយ មានរចនាជាសញ្ញា «ឱម» ព្រមទាំងមកុដរាជ្យ។ ចំណែកឯខ្សែបូមានវិមាត្រ៣៦ម.ម. និងរចនាខុសគ្នាទៅតាមប្រភេទរបស់ឥស្សរិយាភរណ៍។
ក. ប្រភេទមេដាយមាស (Médaille de Vermeil) ខ្សែបូ៖ ៣៦ម.ម., ក្រហម៥ម.ម., ខៀវ៨ម.ម., ក្រហម១០ម.ម., ខៀវ៨ម.ម., ក្រហមម.ម.
ខ. ប្រភេទមេដាយប្រាក់ (Médaille d’Argent) ខ្សែបូ៖ ៣៦ម.ម., ខៀវ១២ម.ម., ក្រហម១២ម.ម., ខៀវ១២ម.ម.
គ. ប្រភេទមេដាយសំរឹទ្ធ (Médaille de Bronze) ខ្សែបូ៖ ៣៦ម.ម., ខៀវ១៨ម.ម., ក្រហម១៨ម.ម.
