មីប្រហិតសាច់គោពីរចាន

ក្មេងប្រុសជំទង់អាយុប្រហែលជា ១៧ ទៅ ១៨ឆ្នាំម្នាក់បាននាំឪពុកដើរចូលមកហាងរបស់ខ្ញុំមើលទៅ​ឪពុក​របស់ក្មេងជំទង់​ម្នាក់នោះដូចជាពិការភ្នែក ព្រោះគេបានដឹកដៃនិងប្រាប់ឲ្យដើរឆ្វេង ដើរស្តាំហើយរៀបចាប់កៅអីឲ្យគាត់អង្គុយ​ ក្មេង​ជំទន់ម្នាក់នោះស្លៀកពាក់សិស្សសាលាមានស្ពាយកាបូបរៀនចាស់មួយ ខ្ញុំស្មានមិនខុសទេ គេប្រហែលជាមកប្រលងបាក់ឌុបជាក់មិនខាន

 

“អញ្ជើញកុម្មង់អីដែរ ?”​ ខ្ញុំស្រែកសួរទៅពួកគាត់

 

“យកមីប្រហិតសាច់គោពីរចានមកបង ”

ក្មេងជំទង់ម្នាក់នោះឆ្លើយដោយសម្លេងច្បាស់ខ្លាំង

 

នៅពេលដែលខ្ញុំចាប់ផ្តើមហែកកញ្ចប់មីដើម្បីស្រុសធ្វើឲ្យពួកគាត់ ស្រាប់តែក្មេងប្រុសម្នាក់នោះលើកបោយដៃដាក់ខ្ញុំ គេញញឹមហើយធ្វើមាត់ហបៗ បែបនិយាយមិនចេញសំលេង

“មីប្រហិតសាច់គោតែមួយចានទេ “​ ព្រមទាំងលើកម្រាម​ចង្អុលមួយជាសញ្ញាហើយ ចង្អុលទៅដាក់ឪពុកគេ

 

ក្រោយពីនោះមកគេក៏បានធ្វើមាត់និយាយប្រាប់ខ្ញុំថា

“ដូរជាមីស្រុះទឹកក្តៅទទេមួយចាន”

ព្រមទាំងចង្អុលទៅរូបនឹងតម្លៃដែលនៅក្រោយខ្នងខ្ញុំ​ មីស្រុះ​ទឹកក្តៅ ១៥០០រៀល​ ហើយក៏ចង្អុលដាក់ខ្លួនឯង

 

ពីដំបូងខ្ញុំក៏មិនសូវយល់ដែរថា ក្មេងជំទង់ម្នាក់នោះត្រូវការអ្វីឲ្យ​ប្រាកដ​ តែម្តាយរបស់ខ្ញុំមកទះដៃ​ខ្ញុំហើយនិយាយតិចៗថា

“គេកុម្មង់មីប្រហិតសាច់គោឲ្យទៅឪពុករបស់គេ ហើយគេកុម្មង់មីស្រុះទឹកក្តៅសម្រាប់ខ្លួនឯង”

 

ពេលនោះទើបខ្ញុំចាប់បាននូវអ្វីដែលគេចង់និយាយ ហើយក៏​លើកដៃធ្វើជាសញ្ញាអូខេ បញ្ជាក់ឲ្យគេដឹងថាខ្ញុំយល់ពីអ្វីដែលគេត្រូវការហើយ

 

ពេលស្រុសដាក់សាច់ដាក់គ្រឿងរួចរាល់ហើយទាំង២ចាន ខ្ញុំក៏លើកទៅឲ្យគេដោយខ្លួនឯង​ “មីប្រហិតសាច់គោ​ ២ចានមកដល់ហើយ អញ្ចើញពិសារ ”

 

“អរគុណបង មីហាងបងពិតជាទំនងឆ្ងាញ់ដល់ហើយ “ក្មេងជំទង់​ម្នាក់នោះញញឹមទទួលមីពីខ្ញុំ ហើយយកចាន់ដែលមានប្រហិតសាច់គោដាក់នៅមុខឪពុកគេ និងចានមីស្រុះទឹកហូបខ្លួនឯង

 

“អញ្ជើញពិសារតាមសម្រួល”​ ខ្ញុំនិយាយហើយកាន់ថាសដើរចេញមកវិញ

 

“អរគុណច្រើន”​ ឪពុកក្មេងនោះបន្លឺឡើង

 

ខ្ញុំដើរចេញមកបណ្តើរ ងាកទៅមើលពីរនាក់ឪពុកកូននោះ​បណ្តើរ

 

“ពុក មីប្រហិតសាច់គោនេះទំនងឆ្ងាញ់ដល់ហើយ ពិសារមួយៗណាពុក ប្រយ័ត្នរលាក់ ព្រោះវានៅក្តៅ ”

ពេលនោះគេក៏ជូតចង្កឹះជាមួយននឹងស្លាបព្រា ហើយចាប់ទៅដាក់ដល់ដៃឪពុករបស់គេ

តែឪពុករបស់គេបែជាមិនដួស ឬក៏ចាប់មីហូបភ្លាមៗទេ

គាត់ប្រើចង្កឹះជ្រាវឆ្កឹះទៅឆ្កឹះមកដូចកំពុងតែរកអីក្នុងចានអញ្ចឹង

ដល់ពេលដែលគាត់ចាប់បានសាច់ ដៃគាត់ម្ខាងទៀតរាវរកចានកូនប្រុសរបស់គាត់ បន្ទាប់មកទៀតគាត់ក៏ចាប់សាច់ដាក់ចានកូនប្រុសរបស់គាត់

 

“ហូបហ៎ ! ហូបច្រើនកូន ហូបឆ្អែតកុំឲ្យបាក់កម្លាំង ពុកចង់ឲ្យកូនប្រលងឲ្យជាប់ ថ្ងៃក្រោយនឹងបានរស់នៅស្រួល មានការងារល្អធ្វើ ”

គាត់ងើបមុខឡើងញញឹមពព្រាយ ទើបធ្វើឲ្យខ្ញុំអាចមើលឃើញភ្នែកពិការដែលសស្លែតទាំងពីររបស់គាត់

 

ខ្ញុំអាចយល់បានខ្លះពីអារម្មណ៍នៃក្តីស្រលាញ់ ក្តីមេត្តា ចំពោះកូនប្រុសរបស់គាត់ម្នាក់នោះ ទោះបីជាគាត់ភ្នែកពិការ តែខ្ញុំអាចមើលឃើញពីភាពភ្លឺច្បាស់ដែលចេញពីចិត្តរបស់គាត់យ៉ាងច្បាស់ក្រឡែត

 

តែអ្វីដែលធ្វើឲ្យខ្ញុំ ចំឡែកចិត្តមួយទៀត កូនរបស់គាត់មិនបានបដិសេធសាច់នឹងប្រហិតដែលឪពុកគេដួសឲ្យនោះទេ

គេគ្រាន់តែនិយាយថាអរគុណពុក ហើយក៏លួចដួសសាច់ដាក់ទៅក្នុងចានឪពុកគេវិញស្ងាត់ៗ​

 

ឪពុកចាប់ឲ្យកូន កូនចាប់ដាក់ឲ្យឪពុកវិញ ចាប់ទៅចាប់មកមួយសន្ទុះ រហូតឪពុករបស់គេនិយាយឡើងថា

“ថៅកែហាងនេះចិត្តល្អណាស់ ដាក់សាច់ឲ្យច្រើនមែនទែន

សូមឲ្យលក់ដាច់រហូតណា ”

 

ខ្ញុំលើកដៃសាធុទទួលដោយមិនដឹងខ្លួន ទាំងដែលខ្ញុំដាក់សាច់ក្នុងចាននោះតែប៉ុន្មានចំណិតទេ

 

“ប្រញ៉ាប់ហូបទៅពុក ចានខ្ញុំមានតែសាច់មើលមីលែងចង់ឃើញទៅហើយ ”

ក្មេងជំទង់និយាយ

 

“អឺៗ ឯងប្រញ៉ាប់ហូបទៅ ឆាប់បានទៅអានសៀវភៅត្រៀមចូលប្រលងទៀត ”

ឪពុកគេនិយាយត

 

នៅសុខៗ ម្តាយរបស់ខ្ញុំ លើកចានសាច់មួយចានដើរកាត់មុខខ្ញុំ សំដៅទៅតុពីរនាក់ឪពុកកូននោះ

 

“អ៊ុំ ! ខ្ញុំអត់បានកុម្មង់ទេ របស់តុគេផ្សេងទេដឹងអ៊ុំ ? ច្រឡំ​តុហើយ ”

ម្តាយរបស់ខ្ញុំក៏ហុចទៅឲ្យក្មេងជំទង់ម្នាក់នោះ

 

“ចាស៎ អត់បានកុម្មង់ហើយក៏ច្រលំដែរ ថ្ងៃនេះជាថ្ងៃគម្រប់ខួបបើកហាងអ៊ុំ

យើងថែមសាច់ឲ្យមួយតុមួយចាន គ្រប់តុណាក្មួយ មួយចាននេះអត់គិតលុយទេ ”

 

ក្មេងប្រុសម្នាក់នោះញញឹមទទួលចានសាច់ពីម្តាយរបស់ខ្ញុំហើយ លើកដៃសំពះអរគុណ ហើយគេក៏មិនសួរអ្វីបន្តទៀតដែរ

 

គេក៏ចាប់សាច់នោះទៅដាក់ក្នុងចានឪពុកគេខ្លះ

ហើយបន្ទាប់មកគេក៏ដកយកប្រអប់ដែលនៅក្នុងកាបូបរបស់គេ ហើយចាប់សាច់ដែលនៅសល់នោះដាក់ក្នុងប្រអប់ទុកក្នុងកាបូបវិញ

 

ខ្ញុំជាមួយម្តាយរបស់ខ្ញុំមើលពីរនាក់ឪពុកកូននោះហូបរួចរាល់ហើយ

ក៏ញញឹមងក់ក្បាលប្រើខ្សែភ្នែកជូនដំណើរគេទាំងពីរនាក់នោះ

 

“អរគុណអ៊ុំ ! អរគុណបង

មីឆ្ងាញ់ណាស់ សុំឲ្យលក់ដាច់រហូត ភ្ញៀវចូលពេញៗណា ”

 

“ថ្ងៃក្រោយចូលមកហូបទៀតមកណាក្មួយ ”

ម្តាយខ្ញុំបន្លឺទាំងស្នាមញញឹម

 

ក្មេងជំទង់ម្នាក់នោះ ញញឹមហុចលុយថ្លៃមី ហើយក៏ចេញទៅ

 

ខ្ញុំដើរទៅប្រមូលចាននៅលើតុរបស់ពួកគេ ពេលដែលលើកចានសាច់ដែលម្តាយខ្ញុំលើកទៅឲ្យនោះឡើងមក ខ្ញុំក៏ឃើញលុយចំនួន៣០០០រៀល ដែលជាថ្លៃសាច់មួយចានហ្នឹងតែម្តង​

 

ខ្ញុំបានតែដកដង្ហើមអាណិត ហើយនិងមានអារម្មណ៍ថាខុស

 

បន្ទាប់មកម្តាយរបស់ខ្ញុំប្រាប់ខ្ញុំថា

“ថ្ងៃនេះអ្វីដែលម៉ែនិងឯងបានរៀនសូត្រពីក្មេងជំទង់ម្នាក់នោះ គឺភាពកតញ្ញូ និង ចរិតមនុស្ស ”

 

ខ្ញុំបានត្រឹមតែងក់ក្បាល ហើយនិយាយខ្សឹបម្នាក់ឯងថា

“សូមជូនពរឲ្យឯងជោគជ័យ ” ។

 

ប្រភព​ពី​ ៖​ ព្រះចន្ទ​ -​ La Lune

កែសម្រួលដោយ៖ ទី សារឿន