សិលាចារឹក Ka 77 ជាភាសាខ្មែរ នៅខេត្តសាកន-នគន(ថៃ) ដែលបានចារឡើងឆ្នាំ១០៦៦

នាឆ្នាំ១៩៩០ កន្លងមកនេះ នាយកដ្ឋានវិចិត្រសិល្បៈថៃ បានរកឃើញផ្ទាំងសិលាចារឹកខ្មែរមួយ នៅភូមិណាផាង ស្រុកប្លាសីវ ខេត្តសាកន-នគន ប្រទេសថៃបច្ចុប្បន្ន ដែល​បានចារ​ឡើង​នៅ​ឆ្នាំ​៩៨៨ នៃមហាសករាជ ត្រូវនឹងឆ្នាំ ១០៦៦ នៃគ្រិស្តសករាជ។ ពោលគឺ ក្នុងរជ្ជកាលរបស់ព្រះបាទឧទ័យាទិត្យទី២ (១០៥០-១០៦៦ គ.ស) ដែលយើង​បានចុះ​លេខរៀង​ក្នុងបញ្ជី​សារពើភ័ណ្ឌ​សិលាចារឹកខ្មែរ Ka 77 ។

បើយើងពិនិត្យលើខ្លឹមសារសិលាចារឹក Ka77 នោះ យើងអាចវាយតមៃ្លបានថា មានការនិយមគំនូរជាសំពត់លើពិតាន សម្រាប់ដាក់ពីលើព្រះពុទ្ធរូប នៅចុងសតវត្សទី ១១ នៃគ.ស.។ ការ​អាន​តាម​ខ្លឹម​សារនៃសិលាចារឹកនេះ បានឲ្យដឹងថា នៅឆ្នាំ ៩៨៨ ស.ក ត្រូវនឹងថ្ងៃ១០ រោច ខែជេស្ន ថ្ងៃច័ន្ទ មានការសា្ថនាឡើង នូវព្រះពុទ្ធបដិមា និងគំនូរលើកំណាត់សំពត់ សម្រាប់ចង​លើ​ពិតាន​វិហារ ដោយអាចារ្យធម៌ ដើម្បីថ្វាយដល់ព្រះសង្ឃ ព្រះនាមសោមង្គល។

ទោះបីជាអត្ថបទសិលាចារឹក Ka 77 របស់យើង មានអក្សរត្រឹមតែប៉ុន្មានបន្ទាត់ យ៉ាងខ្លីក៏ដោយ ក៏វាមានប្រយោជន៍ជាអនេក សម្រាប់យើងដែរ ដូចនៅការបង្ហាញមូលហេតុខាងលើ។

ផល​ប្រយោជន៍មួយទៀត ខាងប្រវត្តិសាស្ត្រ គឺវត្តមានរបស់សិលាចារឹក បានឲ្យយើងដឹងថា នៅឆ្នាំ ១០៦៦ នៃគ.ស. តំបន់នៃខេត្តសាកន-នគន គឺជាទឹកដីរបស់ខ្មែរពីសម័យបុរាណ៕

 

ដោយ៖ មីសែល ត្រាណេ

សិលាចារឹក Ka 77 នៅខេត្តសាកន-នគន(ថៃ)

ទីតាំងភូមិសាស្រ្តនៃខេត្តសាកន-នគន ប្រទេសថៃបច្ចុប្បន្ន