ប្រវត្តិ និងអត្ថន័យរបស់រូបសំណាក កាំភ្លើងកួចកាណុង (Knotted Gun)

ដោយ៖ ទី សារឿន | ថ្ងៃចន្ទ ទី៩ ខែកក្កដា ឆ្នាំ២០១៨ | ចំណេះដឹងទូទៅ | 0 |

4,765

រូបសំណាកកាំភ្លើងកួចកាណុង (Non-Violence sculpture) ដែលស្ថិតនៅរង្វង់មូលស្ពានជ្រោយចង្វារនេះ គឺតំណាងឲ្យភាពគ្មានអំពើហឹង្សា ជាពិសេសគឺការបញ្ចប់សង្រ្គាមបង្ហូរឈាមរវាងខ្មែរនិងខ្មែរ ដែលនាំមកនូវសន្តិភាព និងការអភិវឌ្ឍសម្រាប់ប្រទេសកម្ពុជា។

រូបសំណាកនេះផលិតឡើងពីកាំភ្លើងរាប់ពាន់ដើម ដែលជាសំណល់ប្រមូលបានពីសង្រ្គាម និងការប្រគល់ជូនពីប្រជាពលរដ្ឋ បន្ទាប់ពីមានការអំពាវនាវរបស់លោកនាយករដ្ឋមន្រ្តីហ៊ុន សែន ក្នុងឆ្នាំ១៩៩៧ ក្រោយពីកម្ពុជាបានបញ្ចប់សង្រ្គាមស៊ីវិលរបស់ខ្លួនជាស្ថាពរ ហើយវាត្រូវបានដាក់សម្ភោធនៅក្នុងខែឧសភា ឆ្នាំ១៩៩៨។

រូបសំណាកកាំភ្លើងកួចកាណុងមុនដំបូងគេបង្អស់ ត្រូវបានស្ថាបនាឡើងដោយស្ថាបត្យករស៊ុយអ៊ែតម្នាក់គឺលោក Carl Fredrik Reuterswarp។ លោកបានស្ថាបនារូបសំណាកនេះឡើងក្រោយពីមិត្តភ័ក្តរបស់លោកម្នាក់ឈ្មោះ John Lennon ដែលជាតារាចម្រៀងដ៏ល្បីមួយរូបនៅក្នុងក្រុម Beatle ត្រូវបានគេបាញ់សម្លាញ់ នៅសហរដ្ឋអាមេរិចក្នុងឆ្នាំ១៩៨០។ ក្រោយមកលោកបានប្រគល់រូបសំណាកាំភ្លើងកួចកាណុងនេះទៅឲ្យអង្គការសហប្រជាជាតិ នៅក្នុងឆ្នាំ ១៩៨៨ ហើយវាត្រូវបានគេដាក់តាំងបង្ហាញនៅទីសាធារណៈ និងក្លាយជាទីចាប់អារម្មណ៍មួយនៅក្នុងទីក្រុងញ៉ូវយ៉ករហូតមកដល់ពេលបច្ចុប្បន្ននេះ។

បច្ចុប្បន្ននេះមានរូបសំណាកកាំភ្លើងកួចកាណុងយ៉ាងតិចចំនួន ១៧ទៀត នៅតាមបណ្ដាប្រទេសនានាជុំវិញពិភពលោក ក្នុងនោះមានដូចជា ប្រទេសស៊ុយអ៊ែត, បារាំង, អាហ្រិ្វចខាងត្បូង, ស្វីស, អាឡឺម៉ង់, សហរដ្ឋអាមេរិច, ចិន, លុច សំបួ និងដាណឺម៉ាក់ ជាដើម។ ហើយក្នុងនោះប្រទេសស៊ុយអ៊ែតមានរហូតដល់ទៅចំនួន ១០ រូបសំណាកឯណោះ។

អត្ថបទ៖ ទី សារឿន

រូបសំណាកកាំភ្លើងកួចកាណុង នៅរង្វង់មូលស្ពានជ្រោយចង្វារ