ស្ពានឈើប្រវែងជិត ១គីឡូម៉ែត្រ ឆ្លងកាត់បារាយណ៍ចូលទៅកាន់ប្រាសាទមេបុណ្យ ត្រូវបានសម្ពោធដាក់ឱ្យប្រើប្រាស់
នៅថ្ងៃទី២៩ ខែសីហា ឆ្នាំ២០១៩ នេះ មានពិធីសម្ពោធដាក់ឱ្យប្រើប្រាស់នូវស្ពានថ្មើរជើងអំពីឈើមួយចូលទៅកាន់ប្រាសាទមេបុណ្យ ដោយឆ្លងកាត់បារាយណ៍ មានប្រវែង ៨០០ម៉ែត្រ និងទទឹង ១,៥ម៉ែត្រ។ ស្ពានឈើ ដែលត្រូវបានដាក់សម្ពោធនៅថ្ងៃនេះ គឺជាអំណោយរបស់ ឯកឧត្ដម ឧបនាយករដ្ឋមន្ត្រី កែ គឹមយ៉ាន និងលោកជំទាវ និងត្រូវបានគេប្រសិទ្ធនាមឈ្មោះថា “ស្ពានភ្ជាប់និស្ស័យបារាយណ៍ មេបុណ្យ”។
“ស្ពានភ្ជាប់និស្ស័យបារាយណ៍ មេបុណ្យ” មានទីតាំងស្ថិតនៅភូមិបន្ទាយឆ្មារកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ ចំពោះមូលហេតុដែលគេប្រសិទ្ធនាមឈ្មោះថា “ស្ពានភ្ជាប់និស្ស័យបារាយណ៍ មេបុណ្យ” ត្រូវបានគេឲ្យដឹងថាក៏ព្រោះតែ ទី១: រំលឹកដល់បេតិកភណ្ឌប្រាសាទមេបុណ្យ កសាងនៅចុងស.វទី១២ រជ្ជកាលព្រះបាទជ័យវរ្ម័នទី៧ ដែលទ្រង់ឧទ្ទិសថ្វាយដល់ព្រះវរ:រាជមាតារបស់ព្រះអង្គ។
ទី២: ដើម្បីរំលឹកអនុស្សាវរីយ៍ និងភ្ជាប់និស្ស័យជាមួយ សម្តេចតេជោហ៊ុន សែន នាយករដ្ឋមន្ត្រីកម្ពុជា ដែលបានផ្ដល់ស្រះទឹកយក្សធំៗកាលពីឆ្នាំ២០១៥ និងទទួលវត្តមានរបស់ សម្តេចនាយករដ្ឋមន្ត្រី ចំនួន ២លើក។ និងទី៣: គឺភ្ជាប់និស្ស័យជាមួយ ឯកឧត្ដម កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែ គឹមយ៉ាន ដែលបានដឹកនាំ និងជួយស្តារនិងអភិវឌ្ឍន៍ខេត្តបន្ទាយមានជ័យ និងដោយឡែកនៅឃុំបន្ទាយឆ្មារស្រុកថ្មពួកនេះ។
“ស្ពានភ្ជាប់និស្ស័យបារាយណ៍ មេបុណ្យ” នេះ ត្រូវបានសាងសង់ឡើងដោយក្រុមជាងឈើជាង ១០នាក់ និងប្រើរយៈពេលជិត ៣ខែ។ ស្ពានឈើដែលមានប្រវែងជិត ១គីឡូម៉ែត្រនេះ គឺសាងសង់ឡើងពីឈើក្រាក់ចម្រុះជាច្រើនប្រភេទរួមមាន គគីរ កកោះ ឈើក្រំ ត្រាច ទ្រាស ផ្ចឹក និង រាំង ជាដើម។ ចំពោះស្ថាបត្យកម្ម និងសំណង់ស្ពានឈើនេះវិញ ត្រូវបានផ្ដល់គម្រូដោយក្រសួងវប្បធម៍ និងវិចិត្រសិល្បៈ និងក្រសួងទេសចរណ៍។
ស្ពានឈើនេះ ត្រូវបានគេសាងសង់ដោយភ្ជាប់ពីខ្នងបារាយណ៍នៃទិសខាងលិចម្ដុំស្រះស្រង់ទៅទិសខាងកើត គឺឆ្លងចូលកាត់បារាយណ៍ ទើបឡើងលើទួលប្រាសាទ ត្រឹមកំពែងទី១ រួចចុះកាត់កសិណ ទើបឡើងចូលដល់ប្រាសាទមេបុណ្យ ដែលស្ថិតនៅកណ្ដាលដូចកោះមួយ។ ចំណែកនៅកណ្ដាលប្រាសាទវិញ គេក៏បានស្ថាបនាផ្លូវថ្មើរជើងឈើខ្វាត់ខ្វែងថែមទៀត ព្រមទាំងតាំងទីអាសន:សម្រាប់ភ្ញៀវអុជធូបទៀនបួងសួងសុំសេចក្ដីសុខចម្រើនផងដែរ។