សំណង់សិប្បនិមិត្តនៃប្រាសាទបុរាណខ្មែរបី នៅទឹកដីប្រទេសហ្វីលីពីន

ប្រាសាទបុរាណខ្មែរមិនត្រូវតែជាសម្បត្តិមរតកវប្បធម៌ដ៏មានតម្លៃរបស់ខ្មែរប៉ុណ្ណោះទេ តែប្រាសាទបុរាណទាំងអស់​នោះក៏ជានិមិត្តរូប​របស់​ជាតិ​យើងផងដែរ។ ដោយហេតុនេះហើយ ទើបយើងឃើញមានរូបភាពប្រាសាទនានា ជាពិសេសគឺក្រុមប្រាសាទនៅតំបន់អង្គរ ដូចជា ប្រាសាទ​អង្គរវត្ត និងប្រាសាទបាយ័នជាដើម បានមានវត្តមាននៅលើទង់ជាតិខ្មែរ ក្រដាសប្រាក់ខ្មែរ និងនិមិត្តសញ្ញាជាច្រើនទៀតរបស់ជាតិ។

លើសពីរូបភាពដែលត្រូវបានគេប្រើប្រាស់នៅលើវត្ថុនានាសម្រាប់សម្គាល់ថាជារបស់ជាតិខ្មែរ យើងក៏មានឃើញរូបភាពនៃសំណង់​សិប្បនិមិត្ត​​នៃ​​ប្រាសាទ​បុរាណ​ខ្មែរ ត្រូវបានគេសាងសង់នៅតាមទីតាំងសំខាន់ៗ និងតំបន់រមណីយដ្ឋានមួយចំនួននៅក្នុងប្រទេស និង​មាន​នៅ​​ប្រទេស​មួយ​ចំនួនទៀត ដែលភាពច្រើនជាតំបន់ដែលមានជនជាតិខ្មែរធ្លាប់រស់នៅ និងកំពុងរស់នៅ ឬជាតំបន់​ទេសចរណ៍ល្បីៗ​នៅ​បរទេស​ផងដែរ។

ជាក់ស្ដែងនៅពេលថ្មីៗនេះ យើងឃើញមានរូបភាពចំនួន ៣សន្លឹក ដែលបង្ហាញពីសំណង់សប្បនិមិត្តនៃប្រាសាទបុរាណខ្មែរ ដែលត្រូវ​បានគេ​បញ្ជាក់ឲ្យដឹងថា សំណង់សិប្បនិមិត្តទាំងនេះមានទីតាំងនៅក្នុងទឹកដីនៃប្រទេសហ្វីលីពិន។ នៅក្នុងចំណោមសំណង់សិប្បនិមិត្តទាំង៣ មាន​មួយជាសំណង់ប្រាសាទអង្គរវត្ត និងពីរទៀតជាសំណង់រូបព្រហ្មមុខបួន ដោយមួយមានកាលបរិបច្ឆេទនៃការសាងសង់ គឺឆ្នាំ១៩៨២ នៃ​គ.ស​។

បើតាមការឲ្យដឹងនៅក្នុងទំព័រហ្វេសប៊ុករបស់លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) “HENG Ratana” ដែល​បានបង្ហោះរូបភាពទាំងនេះបានរៀបរាប់ភ្ជាប់ព្រឹត្តិការណ៍មួយដែលធ្វើឲ្យកើតមានសំណង់គម្រូប្រាសាទបុរាណរបស់ខ្មែរទាំង៣នេះ ដោយ​លោកលើកឡើងថា “សំណង់នេះសាងសង់នៅជំរុំភៀសខ្លួនខែ្មរមួយនៅប្រទេសហ្វីលីពីននៅឆ្នាំ១៩៨២ ដែលមានជនភៀស​ខ្លួន​ខែ្មរ​រត់​គេចពីសង្គ្រាមក្នុងស្រុក រត់ទៅប្រទេសជិតខាងនិងប្រទេសទី៣ ដោយមានអ្នកខ្លះត្រូវឆ្លងកាត់ជំរុំនេះ។

សំណង់ទាំងនេះអាចក្នុងន័យរំលឹកនូវកេរ្ត៍មរតកវប្បធម៌របស់ខ្លួន ហើយវាបានក្លាយជាសំណង់ភស្តុតាងនៃការបែកបាក់ព្រាត់ប្រាស់​សង្គម​គ្រួសារ និងសង្គមជាតិដោយសារសង្គ្រាម។ សំរាប់យុវជនខែ្មរជំនាន់នេះអាចមើលឃើញទិដ្ឋភាពសង្គ្រាមនៃការទម្លាក់គ្រាប់បែក កំលាំង​ថ្មើ​ជើងប្រយុទ្ធគ្នាជាក់ស្តែងដូចនៅប្រទេសលីប៊ី ប្រទេសស៊ីរី និងប្រទេសយេមែន ដែលកំពុងមានសង្គ្រាមសព្វថ្ងៃនេះ មិនខុសគ្នាប៉ុន្មានទេ កាល​ពីស្រុកខែ្មរយើងមានសង្គ្រាមនោះ។” ចំណែកខាងក្រោមនេះគឺជាសំណង់សិប្បនិមិត្តនៃប្រាសាទបុរាណខ្មែរមួយចំនួន ដែលទើប​តែសាងសង់​រួចថ្មីៗនេះនៅក្នុងបរិវេណ វិមានឈ្នះ ឈ្នះ win-win memorial។ អត្ថបទដោយ៖ ទី សារឿន