ស្រះប្រុស ដែលគេនិយមផ្តិតយករូបភាពឆ្លុះនៃកំពូលប្រាសាទអង្គរវត្តបានរីងហួតហែង និងកំពុងត្រូវបានបូមទឹកបញ្ចូលបំពេញឡើងវិញ

ដោយ៖ ទី សារឿន​​ | ថ្ងៃព្រហស្បតិ៍ ទី៧ ខែកុម្ភៈ ឆ្នាំ២០១៩​ | ចំណេះដឹងទូទៅ | 0 |
ស្រះប្រុស ដែលគេនិយមផ្តិតយករូបភាពឆ្លុះនៃកំពូលប្រាសាទអង្គរវត្តបានរីងហួតហែង និងកំពុងត្រូវបានបូមទឹកបញ្ចូលបំពេញឡើងវិញ ស្រះប្រុស ដែលគេនិយមផ្តិតយករូបភាពឆ្លុះនៃកំពូលប្រាសាទអង្គរវត្តបានរីងហួតហែង និងកំពុងត្រូវបានបូមទឹកបញ្ចូលបំពេញឡើងវិញ

ស្រះទឹកនៅប្រាសាទអង្គរវត្ត គឺជាផ្នែកមួយដ៏សំខាន់សម្រាប់ភ្ញៀវទេសចរដែលនិយមផ្តិតយករូបភាព​កំពូល​ប្រាសាទអង្គរវត្តឆ្លុះ​ជាមួយ​នឹង​ទឹក។ បើតាមការផ្សព្វផ្សាយរបស់អាជ្ញាធរជាតិអប្សរាបានឲ្យដឹងថា៖ ដោយសារកម្ដៅថ្ងៃហួតហែងខ្លាំងនារដូវប្រាំង​នេះបានធ្វើឱ្យទឹក​នៅ​​ក្នុងស្រះស្រកយ៉ាងលឿន និងបាត់សោភណ្ឌភាពមួយផ្នែក។ ហើយដើម្បីដោះស្រាយបញ្ហាខាងលើនេះឱ្យទាន់ពេល អាជ្ញាធរជាតិអប្សរា បាននិងកំពុងបូមទឹកបញ្ចូលបំពេញក្នុងស្រះនេះឡើងវិញ។

បើតាមការបញ្ជាក់ពីអនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរា លោក ភឿន សុឃីម បានឱ្យដឹងថា ក្រុមការងារ​នាយកដ្ឋាន​គ្រប់គ្រងទឹក កំពុងបូមទឹកពីកសិន្ធុប្រាសាទអង្គរវត្ត បញ្ចូលទៅក្នុងស្រះខាងត្បូង ឬស្រះប្រុស ដែលការងារនេះបានចាប់ផ្តើមពីថ្ងៃទី៣ ខែ​កុម្ភៈ ដែលពេលនេះការបញ្ចូលទឹកសម្រេចបានប្រមាណ ៣០ភាគរយ ស្មើនឹង ១៥០០ម៉ែត្រគូប។ តាមការពន្យល់បន្ថែមរបស់លោក ភឿន សុឃីម ស្រះប្រុសនៃប្រាសាទអង្គរវត្តមានទំហំ ៥០ម៉ែត្រ x ៨០ម៉ែត្រ ដែលអាចផ្ទុកទឹកបានចំនួន ៥០០០ម៉ែត្រគូប។

សម្រាប់ការបូមទឹកបំពេញស្រះនេះ គេត្រូវប្រើរយៈពេលមួយសប្ដាហ៍ទៀត ដើម្បីបញ្ចូលទឹកឱ្យគ្រប់ទៅតាមបរិមាណត្រឹមត្រូវ។ ហើយ​បើ​តាមការ​បញ្ជាក់​របស់លោក ភឿន សុឃីម ការបញ្ចូលទឹកនេះធ្វើឡើងតែស្រះប្រុសតែប៉ុណ្ណោះ ដោយឡែកស្រះខាងជើង ឬស្រះស្រី ដែល​ជា​ចំណុច​​ទាក់ទាញ​ភ្ញៀវទេសចរផងដែរនោះ អាជ្ញាធរជាតិអប្សរាមិនបានបញ្ចូលទេ ដោយទុកឱកាសឱ្យ​នាយកដ្ឋានអភិរក្ស​ប្រាសាទ​ក្នុង​ឧទ្យាន និងបុរាណវិទ្យាបង្ការ ធ្វើកំណាយបន្តទៀតក្នុងគម្រោងស្ដារឡើងវិញនៃរចនាសម្ព័ន្ធស្រះនេះ។

គួរបញ្ជាក់ថា ស្រះទឹកប្រាសាទអង្គរវត្ត គឺជាផ្នែកមួយសំខាន់ដែលភ្ញៀវទេសចរនិយមទស្សនាជាមួយនឹងរូបភាពកំពូលប្រាសាទអង្គរវត្ត ដែលឆ្លុះនៅក្នុងទឹក។ ភ្ញៀវទេសចរនិយមទស្សនានៅទីតាំងទាំងនេះនៅរាល់ថ្ងៃរះ និងថ្ងៃលិច៕

អត្ថបទដើមដោយ ៖ អ៊ីសា រ៉ហ៊ីណី

បញ្ចេញមតិ